في يوم ميلادك ..
القلم واقف مرابط عند شوقك
بيكتب الكلام مدافع تحت بيتك
لويفكر حد ييجي جنب منك
او يفكر يوم يخطي سور عينيكي
وانارمشي عالي
انتي مني قاعدة فوق عرش الليالي
والوتين انتي مين ؟
دا لولا خوفي من الإله لكنتي لي
منهج ودين
انتي مين ؟
إنتي عشق ساكن ف كل زاويه
والحنايا بيك تزين .
فوتي فوق كل الضحايا
من شمالي لليمين .
قلبي راح يكون براحك
علي قد ايدي يكون متاحك
واغلي من العمر بيمين
ماعندي غيره اهديهولك
في يوم ميلادك .
كل آهه فاردة شعرك جنب
مني ع المخدة
غاصبة شوقي ماسايبة نار
العشق تهدا
كل بنت من بنات الفكر قاعدة
وعاملين كمين .
في يوم ميلادك ..
اتولد ف سمانا احنا دي النجوم
وعشان تحدد ضي عينك
كان الكحل من الغيوم
يابنت الشمس والقمر
سُكنِتك ف الروح تدوم
ملكة الليل ف السما
وف الأرض كانوا السهرانين
في يوم ميلادك ..
عاشقين لنورك انتي بس
وانعكاسك ف الجفون
يبتدي تاريخي لما
عشقت حسنك من سنين
والخشوع للعشق واجب
والجوارح فرض عين
في يوم ميلادك ..
الحروف عملالي زفة
والمشاعر عالبيبان
تدق طبول عشق ف معاني
وف ثواني واقفين هناك متجمهرين
كل حرف ف اسمي يهتف
بالمحبة وبالايدين مستسلمين
قلبي عنده فضول بيسأل
ليه عينيك متفرقين متعبترين
بين.النصوص
يامالكةتاج السيطرة
جوا القصيدة بالخصوص
كل الحروف بتعبدك
وانتي نار وهما الماجوس
الحق فين ايه غَّيِره
مين بعتره عند بابك
ورشه علي العتب ضد اللصوص
تبعد اي مختلس
لو يلمحك ماشية.بعيد
عن سكتي والعشق آَّاااااامر
او ناويه عنا تبعدي و تهجري
دفا الدفاتر
اللي من يوم ما اتولد
حب الصبايا ع المنابر
بتملكيه
متخافيش من الوبا
دا كلام جرايد او حقايق
مبقتش فاكر
مبقتش شايف
كل خطوة لسكتي متعقمة
والدرب ناشف
وحضني جاعله للعيون
ترياق أكيد و فوق الشفايف
كلمتين .
( بحبك ) ايوه ( بعشقك )
صدري الوطن وانتي السكن
فخشي برجليكي اليمين .
،،،،،،،، في يوم ميلادك ،،،،،،،،،،
#محمد_فتحي_الشيمي
ليست هناك تعليقات:
إرسال تعليق